Православный календарь

СПРЯТАТЬ ТРОПАРИ

Прор. Иоиля. Тропарь, глас 2.
Предве́дый Бо́жие прише́ствие во пло́ти/ и наи́тие Ду́ха Свята́го и гряду́щий Суд предсказа́вый,/ проро́че Ио́иле:/ спаса́й моли́твами твои́ми/ чту́щия тя от всех скорбе́й.

Кондак пророка Иоиля, глас 4.
Просвети́вшееся Ду́хом чи́стое твое́ се́рдце/ проро́чества бысть светле́йшаго прия́телище:/ зри́ши бо, я́ко настоя́щая, дале́че су́щая,/ сего́ ра́ди тя почита́ем, проро́че, блаже́нне Ио́иле, сла́вне.

Тропарь мученику Уару, глас 4.
Во́инством святы́х страстоте́рпец стра́ждущих зако́нне,/ зря о́нех, показа́л еси́ му́жески кре́пость свою́./ И устреми́вся на страсть во́лею,/ и умре́ти вожделе́ за Христа́,/ И́же прия́л еси́ по́честь побе́ды твоего́ страда́ния, Уа́ре,/ моли́ спасти́ся душа́м на́шим.

Кондак мученику, глас 4.
Христу́ после́дуя, му́чениче Уа́ре,/ Того́, испи́в ча́шу,/ и венце́м муче́ния увязе́ся,/ и со Áнгелы ликовству́еши:/ моли́ непреста́нно за ду́ши на́ша.

Ппрп. Иоанна Рыльского. Тропарь, глас 1.
Покая́ния основа́ние, прописа́ние умиле́ния,/ о́браз утеше́ния, духо́внаго соверше́ния/ равноа́нгельное житие́ твое́ бысть, преподо́бне./ В моли́твах у́бо и в поще́ниих и в слеза́х пребыва́вый,/ о́тче Иоа́нне,/ моли́ Христа́ Бо́га о душа́х на́ших.

Кондак, глас 8.
Áнгельскому житию́ поревнова́в, преподо́бне,/ вся земна́я оста́вив, ко Христу́ прите́кл еси́/ и, Того́ за́поведьми огражда́яся,/ яви́лся еси́ столп непоколеби́м от вра́жиих нападе́ний./ Тем зове́м ти:/ ра́дуйся, о́тче Иоа́нне, свети́ло пресве́тлое.

Блгв. царевича Димитрия, Угличского. Тропарь, глас 2.
Я́ко благочести́ваго ко́рене Боголюби́вый произы́де плод,/ я́ко а́гня незло́биво, непови́нно во младе́нстве за́клан бысть/ от властолю́бца вку́пе и зла́го раба́./ Тем, я́ко златы́ми кры́лы,/ душе́вною чистото́ю и младе́нческим незло́бием/ к Небе́сней высоте́ возлете́л еси́, страстоте́рпче Дими́трие./ И ны́не кровь твоя́ от земли́ та́йно вопие́т к Бо́гу,/ я́ко Áвеля пра́веднаго./ Сего́ ра́ди покланя́емся ве́рою ти,/ сла́вяще просла́вльшаго тя Бо́га,/ Его́же моли́ стране́ на́шей Богоуго́дне бы́ти/ и сыново́м ру́сским спасти́ся.

Ин тропарь, глас 1.
Всеору́жеством Ду́ха благода́ти вооруже́н быв/ и необори́м столп и утвержде́ние оте́честву своему́ показа́ся,/ я́ко а́гнец незло́бивый, от врага́ непра́ведно за́клан быв/ и в же́ртву непоро́чну Го́сподеви принесе́ся./ И ны́не дар благода́ти от всех Подвигополо́жника прие́м,/ источа́еши всем исцеле́ние, достохва́льне благове́рный царе́вичу кня́же Дими́трие./ Сла́ва Восприи́мшему тя от земны́х в Небе́сная,/ сла́ва Венча́вшему тя венце́м неувяда́емым,/ сла́ва Де́йствующему тобо́ю всем исцеле́ние.

Тропарь, глас 2.
Вели́ка обре́те тебе́ целе́бника в после́днем ро́де,/ лю́ди твои́, ру́стии наро́ди,/ но́вый страстоте́рпче Христо́в, благове́рный царе́вичу кня́же Дими́трие,/ возсия́ бо на земли́ чудесы́ свои́ми, я́ко звезда́ небосве́тлая,/ но, созре́лый у́бо клас Христу́, испи́в ча́шу,/ я́ко а́гнец непоро́чен, за́клан бы́сть в же́ртву чи́сту,/ принесе́ себе́ Влады́це всех,/ от Него́же побе́дным венце́м увязе́ся,/ просия́ ми́рови, я́ко со́лнце,/ пре́лести вся угаси́л еси́/ и Собо́рную обогаща́вши Це́рковь чудотворе́нии,/ стране́ на́шей на враги́ побо́рник,/ одержи́мым же разли́чными неду́ги врач,/ всех нас освяща́еши бога́тными дарова́нии, всехва́льне,/ и моли́твами, свя́те, твои́ми всем дае́ши Боже́ственное исце́ление.

Ин тропарь, глас 4.
Ца́рскою диаде́мою оде́ян, Богому́дре му́чениче,/ за ски́петр крест в ру́ку прии́м,/ яви́ся я́ко победоно́сец/ и всесожже́ния же́ртву свяще́нну себе́ прине́сл еси́, Дими́трие,/ показа́ся изря́ден врач ру́сской стране́,/ о́браз в себе́ чудотворе́ния нося́,/ я́ко а́гнец непоро́чен, от раба́ заколе́ние прия́т,/ убива́ющаго те́ло, души́ же косну́тися не мо́гуща./ Да пла́чется у́бо злый властолю́бец,/ ты же, ра́дуяся, предстои́ши Святе́й Тро́ице,/ моли́ся стране́ на́шей Богоуго́дне бы́ти/ и сы́новом ру́сским спасти́ся.

Кондак, глас 8.
Возсия́ днесь благоцвету́щая о́трасль благочести́ваго ко́рене,/ от благове́рных Росси́йския страны́ доброра́сленный грозд израсте́/ и Христо́ви кра́сен плод прозябе́./ Те́мже от земли́ Воззва́вый тя к ве́чным оби́телем,/ соблюда́ет и по убие́нии твое́м невреди́мо те́ло твое́,/ страда́льчески обагрено́ кро́вию;/ благоро́дне свя́те Дими́трие,/ соблюда́й оте́чество свое́ и град твой невреди́м,/ тому́ бо еси́ утвержде́ние.

Кондак, глас 8.
Свети́ло яви́ся пресве́тлое днесь Боже́ственная па́мять твоя́,/ Богодаро́ванная ти чудеса́ от вся́ких многоразли́чных неду́г подаю́т исцеле́ния/ с ве́рою призыва́ющим тя,/ созыва́ющи нас к похвале́нию просла́вльшаго тя Бо́га,/ Его́же моли́, страстоте́рпче благове́рный Дими́трие,/ мир ми́рови дарова́ти/ и от ви́димых враг лю́ди невре́дны сохрани́ти, да зове́м ти:/ ра́дуйся, ты бо еси́ утвержде́ние гра́ду на́шему.

Сщмч. Садока. Тропарь, глас 4.
И нра́вом прича́стник,/ и престо́лом наме́стник апо́столом быв,/ дея́ние обре́л еси́ богодухнове́нне,/ в виде́ния восхо́д:/ сего́ ра́ди сло́во и́стины исправля́я,/ и ве́ры ра́ди пострада́л еси́ да́же до кро́ве,/ священному́чениче Садо́фе,/ моли́ Христа́ Бо́га,/ спасти́ся душа́м на́шим.

Кондак, глас 4.
Влады́чню рече́нию усе́рдно в подо́бстве после́дова,/ я́ко у́бо па́стырь до́брый ду́шу свою́ за Христо́вы о́вцы положи́л еси́,/ священному́чениче Садо́фе,/ мо́лим тя, многострада́льне,/ моли́ па́стырем нача́льника Христа́/ и нас причести́ десна́го ове́ц стоя́ния,/ да воспое́м ти:/ ра́дуйся, свяще́нный о́тче Садо́фе,/ и́же за Христа́ кровь свою́ излия́вый.